"British Counsil"un ilk ofisi 1934-cü ildə Misirdə
yaradılıb. Böyük Britaniya hökumətinin ölkələr arasında yaradıcılıq,
təhsil, cəmiyyət və digər münasibətləri yaxşılaşdırmaq məqsədilə
yaratdığı qurum sonralar dünyanın əksər ölkələrinə yayılmağa başladı.
Hazırda dünyanın 110 ölkəsində nümayəndəliyi olan elm ocağının ən
axırıncı nümayəndəliyi bu il İraqda və Əfqanıstanda yaradılıb. Qrumun
baş ofisinin rəhbəri Devid Qrindir.
"İngilis dilini Böyük Britaniyada öyrənən milyonlarla
insana qoşulun və XXI əsrdə özünüzü inamlı hiss edin!" Bu, "British
Counsil"un əsas şüarıdır. "Niyə məhz bu ölkədə" sualını isə "British
Counsil"un üzvləri Böyük Britaniyanın ingilis dilinin vətəni olması,
həmin ölkədə təhsilin ilk günündən müasir ingilis dilindən istifadə,
Britaniya filmləri, televiziya, qəzet və kitablar, əyləncənin mövcudluğu,
həmin ölkənin ən yaxşı təhsil mərkəzlərində tədris sahəsində əla
keyfiyyət ənənəsi və başqa amillərlə izah edirlər. "British Counsil"
ingilis dilini təkmilləşdirmək istəyən hər bir şəxsə Böyük Britaniya
məktəblərində kurs keçmək imkanı təklif edir. Bu təhsil ocağı yalnız
"English in Britain Accreditation Scheme"nin (EiBA) akkreditasiya
etdiyi təhsil mərkəzləri ilə əməkdaşlıq edir. EiBA Böyük Britaniyada
fəaliyyət göstərən özəl məktəblər üzrə beynəlxalq miqyasda tanınmış
yeganə akkreditasiya sistemidir. Böyük Britaniyada EiBA-nın 380-dən
çox mərkəzi mövcuddur. Bu mərkəzlərdə geniş çeşidli kurslar təqdim
olunur. Buraya ən qənaətcil kurslardan tutmuş ən yüksək səviyyədə
təşkil olunmuş şərait və yaşayış yerləri təqdim edən universitet
və özəl məktəblərin kursları daxildir. "British Counsil" akkreditasiyadan
keçmiş mərkəzlərin bir sıra keyfiyyət standartlarına cavab verməsi
üçün onları ciddi şəkildə yoxlayır.
Artıq on ildir ki, "British Coincil"un Azərbaycanda
da nümayəndəliyi (www.britishcouncil.az)
fəaliyyət göstərir. Qurumun ikinci rəhbəri, 1998-ci ildən ölkəmizdə
işləyən Marqaret Cek Azərbaycanda fəaliyyətini ötən aylarda sona
yetirdi. Hazırda "British Council"in Azərbaycandakı nümayəndəliyinə
Endi Uilyams rəhbərlik edir.
Azərbaycan vətəndaşları da "British Coincil"in
xidmətlərindən istifadə edir. Bu təhsil ocağı ingilis dilində təlim
almaq istəyənlərə yüksək keyfiyyətli və beynəlxalq standartlara
cavab verən xidmətlər göstərir. Bu xidmətlər bir sıra təkliflər
- ümumi ingilis dili, biznes ingilis dili, korporativ müştərilər,
gənc öyrəncilər üçün kurslar, imtahanlara hazırlıq, yerləşdirmə
testləri, hesabatlar və sertifikatlar şəklindədir. Ümumi ingilis
dili dərsləri gündəlik ünsiyyət mövzularını və qrammatikanı əhatə
edir, tələbələrə öncədən dildən istifadəyə şərait yaradır. Dil anlayışına
və danışıq qabiliyyətinə üstünlük verilsə də, oxu və yazı metodikanın
vacib hissələri kimi tədris olunur. Biznes ingilis dilini isə test
imtahanlarında üçüncü səviyyəyə nail olan tələbələr işgüzar ingilis
dili kurslarına qoşulmaqla öyrənirlər. Təşkilatlar üçün xüsusi planlaşdırılmış
kurslar ümumi ingilis dili, beynəlxalq imtahanlara hazırlıq proqramları
və korporativ müştərilər üçün xüsusi bilik proqramlarını əhatə edir.
Bu kurslar Kembric Universitetinin imtahanlarına - FCE (First Certificate
in English), CAE (Certificate in Advanced English), CPE (Certificate
of Proficiency in English) - hazırlaşdırır. "British Coincil"un
gənc öyrənci kursları uşaqlar, xüsusən 16 yaşına qədər olan yeniyetmələr
üçün nəzərdə tutulub. Bu dərslərdə onlar Böyük Britaniya haqqında
yeni biliklər əldə edir, beynəlxalq mühitlə ünsiyyət qurur, bir
çox sahələrdə təcrübə toplayırlar. Əgər "British Coincil"un
dil kurslarında təlim planlaşdırılırsa, istəyənlər ödənişsiz yerləşdirmə
testlərinə dəvət olunur, həmin testlər müraciət edənin yazı və oxuma
qabiliyyətini müəyyənləşdirir. Tələbələr isə dərslərindəki uğurdan
və imtahan nəticələrindən asılı olaraq sertifikatlarla təmin edilə,
həmin məlumata və onların davamiyyətinə əsasən tələbələr səviyyəyə
keçə bilərlər. İl ərzində 4 dəfə - hər fəsildə qeydiyyat aparılır
və kurslar həm adi, həm də tezləşdirilmiş vaxtlarda keçirilir. Tələbələr
isə 8 səviyyədə, müxtəlif istiqamətlərdə, iki həftədən bir ilə kimi,
tələbələrin seçimindən asılı olaraq dərs saatlarının müəyyənləşdirilməsi
ilə təhsil almaq imkanı qazanırlar. Yalnız təhsilin səviyyəsinə
deyil, həmçinin yaşayış şəraitinə (ailədə, tələbə yataqxanalarında
və ya mehmanxanada), eləcə də tələbələrin asudə vaxtlarının təşkil
olunmasına nəzarət edilir, uşaqlarla işə cəlb olunan müəllim və
işçi heyətinin ehtiyatlı seçiminə imkan yaradılır. 1999-cu ildə
əsası qoyulan illik təkmilləşdirmə kursları vətəndaşları daha çox
cəlb edir.
 |
"British Council" tələbələrinə "Cheveninq Scholarıhirs"
- Azərbaycan vətəndaşları üçün Britaniyada təhsil almaq imkanı (www.chevninq.com)
və "EFL Placement Scheme" - ingilis dilini Böyük Britaniyada öyrənmək
imkanı da yaradır. "British Council"un Bakıdakı informasiya mərkəzi
Böyük Britaniya haqqında daha çox məlumat axtaranları həmin sahədə
peşəkar xidmətlərlə təmin edir. Bu mərkəz müxtəlif sahələri (siyasət,
iqtisadiyyat, mədəniyyət, incəsənət və s.) əhatə edən qəzet və jurnallar,
BBC televiziya kanalı, ensiklopediyalar, lüğətlər, mərkəzin üzvləri
üçün pulsuz elektron xidmətləri təklif edir.
|
