TRENİNQ - SEMİNARLAR

"İnam" Plüralizm Mərkəzi 10 il ərzində siyasi, iqtisadi, azad seçkilər, vətəndaş təhsili, insan hüquqları və başqa mövzularla bağlı 2100-dən artıq seminar keçirib. Bu tədbirlərdə Azərbaycanın 40 bölgəsindən 6 mindən çox adam iştirak edib.

"GƏNC SİYASİ LİDERLƏR MƏKTƏBİ" PROQRAMI

1996/99-cu illərdə həyata keçirilən "Gənc Siyasi Liderlər Məktəbi" proqramı Azərbaycanda gənc siyasətçilərin hazırlanması baxımdan ilk layihələrdəndir.

Proqram çərçivəsində Azərbaycanın müxtəlif siyasi partiyalarının 200-dən artıq gənc üzvünün iştirak etdiyi 52 seminar keçirilib. Bu seminarlarda gənc siyasətçilər çağdaş siyasi biliklər, demokratik dövlətlərdə toplanmış nəzəri və praktiki təcrübə, plüralist demokratiya, vətəndaş hüquqları, siyasi hüquqlar, siyasi cərəyanlar, bəzi demokratik dövlətlərin strukturu, demokratik seçki, azad KİV və politologiyanın müxtəlif sahələrilə bağlı mövzularla tanış olublar. Hər seminarın mövzusuna aid broşurlar çap edilərək iştirakçılara paylanıb.

Əsasən Azərbaycanın kənd rayonlarından olan iştirakçılar ölkənin tanınmış siyasi liderləri, ictimai xadimləri ilə, həmçinin xarici ölkələrdən gəlmiş curnalist və politoloqlarla görüş keçirmiş, diskusiyalar aparmışlar. Müxtəlif siyasi ideologiyaların təmsilçiləri olan iştirakçılar öz aralarında ünsiyyət və konstruktiv dialoq vərdişlərinə yiyələniblər.

AZAD VƏ ƏDALƏTLİ SEÇKİLƏR PROQRAMI

Mərkəz ölkənin müxtəlif şəhər və rayonlarında demokratik yönlü siyasi partiyaların seçki qərərgahlarının və müstəqil namizədlərin seçki komandalarının üzvləri üçün 1, yaxud 2 günlük treninq-seminarlar keçirir.

Treninqlərin əsas mövzular bunlardır:

• Elektoratla işin təşkili üçün nəyi bilməli
• Namizədin zəruri addımları
• Seçki kampaniyasının strategiyası
• Seçki kampaniyasının təşkili və planlaşdırılması
• Seçki komandasının formalaşdırılması
• Rəqiblərin təhlili
• Mətbuatla iş
• Seçki platformasının hazırlanması
• Cəlbedici imicin tərkib hissələri
• Təbliğatın təşkili
• Müşahidəçi üçün 11 qızıl qayda
• Seçki günü müşahidə

2000-ci il parlament seçkiləri ərəfəsində Mərkəz ölkənin 15 rayonunda "Azad seçkilər" mövzusunda treninq-seminarlar keçirilib. Bu tədbilərdə 500 nəfərə qədər fəal seçici, müşahidəçi və namizəd iştirak edib.

Bütün iştirakçılara Mərkəzin seçkilərlə bağlı çap etdiyi broşurlar verilir.

"VƏTƏNDAŞ CƏMİYYƏTİNDƏ YAŞAMAQ İSTƏYİRİK" PROQRAMI

"İnam" Plüralizm Mərkəzi 2000-ci ildən etibarən "Vətəndaş Cəmiyyətində Yaşamaq İstəyirik" adlı proqram həyata keçirir. Bu proqramda məqsədimiz treninq-seminarlar və onlara əlavə edilən nəşrlər vasitəsilə Azərbaycanın regionlarında ictimai fəallığın yüksəldilməsi, üçüncü sektor strukturlarının formalaşması və inkişafı, yeni Təşəbbüs Qrupları və QHT-lərin yaranmasına kömək etməkdir.

Mərkəz indiyədək bu proqram çərçivəsində Azərbaycanın 17 bölgəsində 500 nəfərdən çox fəalın iştirak etdiyi 24 treninq-seminar keçirib.

Treninq-seminarlar 3 mərhələdə keçirilir:

1. YERLİ İCTİMAİ FƏALLAR ÜÇÜN TRENİNQLƏR (1 günlük)

Məşğələnin mövzuları:

Demokratiyanın təməl prinsipləri, Vətəndaş cəmiyyətinin strukturu, Sən fəalsan. Səni hansı problem düşündürür?, Sən fəalsan. Problemi necə həll edərsən?, Könüllülər, Könüllülər üçün stimul mənbəyi, Könüllülərin cəlb olunması strategiyası, Təşkilatlanma, Demokratik təşkilatın strukturu, Fəaliyyətin planlaşdırılması

2. QEYRİ-HÖKUMƏT TƏŞKİLATLARI LİDERLƏRİ ÜÇÜN TRENİNQLƏR (3 günlük)

Məşğələnin mövzuları:

QHT-lərin cəmiyyətdə rolu, Liderlik stili, İdeal lider, İdeal işçi, Liderlik nəzəriyyələri, Rəhbər kollektivin formalaşdırılması, Bölünən rəhbərlik, Yığıncağın keçirilməsi prinsipləri, Planlaşdırmanın metodları, İdeyaların reallaşdırılması, Layihə üçün resurslar, Layihəni necə yazmalı, Donorlar, Sponsoru necə başa düşməli

3. TRENERLƏR ÜÇÜN TRENİNQLƏR (2 həftəlik)

Trenerliyə namizədlər seminar iştirakçıları tərəfindən seçilirlər. İkihəftəlik gərgin məşğələdən sonra iştirakçılar təcrübəli həmkarların köməkliyilə müxtəlif sınaq treninqləri keçirirlər.

Bütün bunlardan sonra trenerlər müxtəlif treninq, seminar və görüşlərdə öz bilik və bacarıqlarını inkişaf etdirirlər. Mərkəz hələlik 2 (avqust 2000, fevral 2002) dəfə belə treninq keçirməyə nail olub. İnam Plüralizm Mərkəzi sərbəst treninq-seminarlar apara bilən trener komandasının yaranmasını özünün bu sahədə ən böyük uğuru hesab edir. Bu trener komandası Polşanın Demokratiya üçün Təhsil Fondunun və ABŞ-ın Şərqi Avropa Demokratiya İnstitutunun yöməkliyi sayəsində yaranıb.

Bir çox təşkilatlardan fərqli olaraq, Mərkəz öz fəaliyyətində peşəkar-trenerlərin və daimi işçi-trenerlərin əməyindən istifadə etmir. Biz işimizi trener komandasına daxil olan Mərkəzin proqramları üzrə təlim keçmiş müxtəlif yerli QHT-ləri təmsil edən trenerlərlə qururuq.

İnam artıq Azərbaycanın müxtəlif bölgələrində vətəndaş təşəbbüsü, açıq cəmiyyət, demokratiya ideyalarını daha effektiv yaya, bu bölgələrdə demokratik fikirli fəalların və liderlərin yetişməsinə və təşkilatlanmasına, ictimai sektorun yaranması və inkişafına yeni metodoloci əsaslarla yardım edə bilir.

İNSAN HÜQUQLARI MÜDAFİƏÇİLƏRİ ÜÇÜN TREYNİNQ-SEMİNARLAR PROQRAMI

1999 / 2001-ci illərdə "Bölgələrdə yaşayan və fəaliyyət göstərən insan hüquqları müdafiəçiləri üçün" proqramı çərçivəsində 20 treyninq-seminarlar keçirilib.

MÖVZULAR

1. İnsan hüquqlarının qorunması və təşviqi ilə məşğul olan milli təsisatlar
2. İnsan hüquqlarının qorunması üçün Avropa mexanizmləri
3. Əlillərin hüquqlar
4. Uşaq hüquqları
5. Qadın hüquqları
6. Hərbi qulluqçuların hüquqları
7. Kütləvi informasiya vasitələri və insan hüquqları
8. İnsan hüquqları və seçkilər
9. İstehlakçıların hüquqları
10. Etinik azlıqların hüquqları və münaqişələrin tənzimlənməsi
11. İqtisadi, sosial və mədəni hüquqlar
12. Qanun pozuntuları zamanı sənədləşdirmə və müraciət qaydaları
13. İnsan hüquqlarına dair mexanizm
14. İnsan hüquqları müdafiəsi tarixindən
15. İnsan hüquqları və qaçqınlar
16. İnsan hüquqları: Bəşəriyyətin başlıca ideyası
17. Əməkçi miqrantların hüquqları
18. Məhbusların hüquqları
19. İctimai müdafiənin təşkili
20. Azərbaycanda siyasi hüquqların və azadlıqların qanunvericilik təminatları

İŞTİRAKÇILAR

Bu treninq-seminarlarda Azərbaycanın 23 şəhər və rayonundan 52 hüquq mudafiəçisi daimi iştirakçı olub.

Bu tədbirlərdə ölkənin 25-dən artıq tanınmış alim və mütəxəsislərin məruzələri dinlənilmişdir. Məşğələlər İnam Plüralizm Mərkəzinin trener komandası tərəfindən aparılıb.